今次要分享嘅內容就係DSE經常考核嘅一個概念：對比同襯托到底要點分？
向理解兩者有咩不同之前，首先要知道兩者嘅定義有咩唔同：
對比：把兩個相對或相反的事物，或者一個事物的兩個不同面並列，相互對照。
襯托：為了突顯事物的特質，用性質相似或相反的事物作比較。
大家會分唔清兩者，係因為兩者都關於兩件事物嘅比較，但只要知道兩種修辭嘅目的就可以「更準確」釐清佢地。
對比嘅用意係要強調兩者之間嘅不同，所以句中A同B嘅關係屬平等，兩者同為主角。例如：「懶惰者永遠不會在事業上有所建樹，永遠不會使自己聰明。唯有勤奮者才能在無限的知識海洋裏獵取到真智實才，開拓知識領域。」呢一句入面，作者就係想透過「懶惰者」同「勤奮者」嘅比較來強調兩者之間嘅差異。
相反，襯托嘅用意就係要突顯其中一方嘅形象，所以句中A同B嘅關係係有主次之分，即一個係主角，一個係配角。例如：「寒冷中，百花凋零，惟有這棵老松樹屹立於寒風中。」呢一句入面雖然「百花」同「老松樹」呈現出相反嘅性質，但主角卻放左向「老松樹」身上，所以作者之所以提及「百花」並唔係想強調兩者嘅差異，以係要用「百花」來襯托「老松樹」嘅堅忍不拔嘅形象，所以呢句就屬於襯托。
另外要留意，襯托亦可分為正襯同反襯，所以襯托唔一定用於相反性質嘅比較，亦可用於相同性質嘅比較。例如「桃花潭水深千尺，不及汪倫送我情。」李白向呢句詩入面就利用「桃花潭」嘅水深黎襯托友人對自己的情深，前者雖深，但後者更深，所以呢句亦屬襯托。同時，兩者同為「深」，屬相同性質，所以呢句就係一個正襯嘅例子。
補充多一點，上面講到知道兩者嘅定義之後可以「更準確」釐清佢地。我之所以咁講係因為襯托同對比向某d情況下其實就好難分清到底作者想強調差異定係突顯其中一方形象。不過就DSE出題念黎講，只要見到題目寫作者以「A」來刻劃「B」的形象，咁個答案就離唔開襯托啦，因為襯托多數用於描寫，而對比則多數用於議論，同時呢句問題入面已經暗示左兩者呈現主次關係。
好！收工～希望幫到大家：）
＃語文知識 ＃襯托 ＃對比 ＃正襯 ＃反襯 ＃中文補習 ＃DSE中文
Comments