「到底幾時係借喻幾時係借代？」呢個問題實在俾太多學生問過，今日就向到一次過講哂，以後有學生問都tag佢向呢個post 😎

要識分，當然首先要知佢地分別指咩先啦。借喻係比喻嘅一種，只有喻體，冇本體、冇喻詞。例如：一把銀白色的彎刀掛在夜空。銀白色彎刀係比喻緊月亮，向呢句入面我直接用喻體代替本體（月亮），呢種手法就係借喻。值得一提嘅係，明喻暗喻借喻三種同屬比喻，其實係可以互通，正如上面個句，我地用明喻就可以寫成：月亮好像一把銀白色的彎刀。

而借代之所以會有學生將佢同借喻混淆，就係因為借代係利用一少部分/典用特質代替本體嘅一種修辭手法，兩者既本體都被另一樣野取代。借代其中一個例子就係：過盡千帆皆不是。句中嘅千帆就係借代緊帆船。

要明白兩者既分別，第一樣要留意就係借喻係建基於兩者既相似性，相反借代則建基於兩者既相關性。我地用千帆代替帆船係因為帆就係帆船最有代表性嘅地方，兩者係相關。我地絕唔會話：嘩，個帆好似帆船！（兩者並不相似）又例如我地用絲竹借代樂器，就係因為古時樂器都係絲同竹做，所以用左呢個相關嘅特質代替左樂器，但我地唔會話：碌竹好似樂器一樣。（佢地並非因相似性而互通）

第二點可以留意就係比喻嘅目的係生動活潑咁描寫對象，所以借喻中本體同喻體往往係截然不同嘅事物。例如：湖水是一面鏡子。但借代就正正相反，好多時佢地都係屬同一事物。例如：烽火借代戰爭，干戈（兵器）又借代戰爭。

好啦，最後俾兩個例子大家思考下，邊句係借代，邊句係借喻😉

1. 春天為大地鋪上了一張綠毯子。 2. 春天為大地鋪上了一片綠。

此外，大家又知唔知以下呢幾篇範文邊到有用借代呢？

－岳陽樓記

－念奴嬌

－始得西山宴遊記

知既同學仔留言話我知！

想知更多中文科應試資訊記住follow https://www.instagram.com/adrianchinese/ 啦：）