範文雖然只佔中文科7%，但係相比起中文科其他部分，呢一Part可以話係多勞多得，付出同收穫絕對係成正比。
當然要熟讀呢一部分絕對要花上唔少時間，所以愈快起步，絕對係愈有優勢！我自己係舊制既DSE生，所以讀書時係冇讀過範文，但係為左考DSE就用左三個月時間自修，以下係我建議各位同學可以參考既方法：
Step 1 : 熟背課文 （一定要背！一定要背！一定要背！重要的事情說三次）
範文入面有好多摘錄原文或者內容理解題目，基本上唔背係一定答唔出，例如 18 年問考生《青玉案》入面，作者向何時何地遇到心上人 （驀然回首，那人卻在燈火闌珊處。）又問到《勸學》入面，不停學習可以帶來什麼好處 （智慧通明，行為沒有過錯。）所以只要做好背誦，範文就會保有基本分數。
當然12篇都要一字不漏背哂確實係唔容易，我自己都冇刻意咁做，然而不同文章，需要熟記既程度都有所不同。
通篇一字不漏背誦型：
《論仁、論孝、論君子》、《始得西山宴遊記》、《岳陽樓記》、三首詩、三首詞
熟讀重心句型：
《勸學》、《出師表》、《師說》、《六國論》
何謂重心句？例如讀完師說，你唔會唔知老師職責係：「師者，所以傳道、授業、解惑也。」
讀完六國論唔會唔知作者用乜比喻賂秦既不智：「以地事秦，猶抱薪救火，薪不盡，火不滅。」
重內容多於句子型：
《魚我所欲也》 、《逍遙遊》、《廉頗藺相如列傳》
以上三篇，唔係禁止大家去背，當然背到永遠好過無背，但以上呢幾篇與其要背熟每一句，更應該做既係疏理整個故事既發展同內容，例如問及不龜手之藥時，比起摘錄原文，你更需要清楚了解不龜手之藥點樣大用同小用，以及呢個例子背後說明左咩道理。
Step 2 : 通篇速覽，掌握全文大意
大家溫習一篇範文時，一定要先思考到底呢篇範文想我地學D咩，然後再朝住呢個大方向去溫先會有效率。當然，唔係每個同學對於疏理文章內容既能力都咁強，呢個時候一本好既參考書就可以幫到你。（坊間實在有太多本，我偶爾翻閱都會發現不同出版社帶錯漏既地方，但首推一定係用啟思相關既教材）
例如讀《廉頗藺相如列傳》時，首先你要知道呢一課都係以敍事寫人既方式貫穿全文，當中以秦王、藺相如、廉頗三人為主角，而故事既主軸就分為「完璧歸趙」、「澠池之會」及「負荊請罪」三大部分，因此同學讀既時候，就要份外留意不同人物之間既言行分別反映左佢地既咩既性格特質，以及當中運用左直接既人物描寫定係間接描寫，呢D重心都係同學可以溫習時預先整理好，然後再深入研習各部分。
Step 3 : 通篇意譯一次，掌握文章內容
呢到既意譯，唔係指要每隻字都識解，因為除非同學本身文言基礎好，對各項一詞多義、文言虛詞都熟習，如果唔係要熟記12篇既語譯絕對係一項大工程，一般建議同學最後先溫習。意譯即係每一句都大概知佢講乜，即係話同學向閱讀文言版本時，唔應該對文章有任何一部分係唔知咩意思既，做到呢一點，就離成功一半啦。
Step 4 : 操練試題，運用所學
其實範文早向會考年代已經有，所以有唔少篇章都有歷屆試題俾同學操練，而坊間唔少出版社都有出範文練習，等同學可以熟讀各種題型。2019年開始出左一D深度既思考題，最後一篇文言文更要求同學要同《論君子》既君子求諸己及《逍遙遊》既無用之用做比較，跨篇章比較既題型其實非並新鮮事，就算最後有冇出都好，都鼓勵同學多做，因為可以好快速咁幫大家清concept，以下就俾一條大家思考下：
《登樓》和《始得西山宴遊記》兩文所抒發的情懷有何相似之處？試根據文章內容加以說明。（5分）
